रायगढ़ :- बड़े-बड़े रेस्टोरेंट अउ होटल के चमक-दमक ले अलग, छत्तीसगढ़ के असली स्वाद तो अइसने छोटे-छोटे ठिकाना में बसथे। वित्त मंत्री अउ रायगढ़ विधायक ओपी चौधरी ह आज नवा रायपुर के सेक्टर-22 चौक के तीर स्थित अम्मा दाई होटल में अपन लोगन मन संग बइठ के देसी खाना के आनंद लिस। अपन सोशल मंच में तस्वीर साझा करत ओपी चौधरी ह लिखिन अम्मा दाई होटल मं अपन लोगन मन संग घर जइसन देसी खाना खाय के आनंद मिलिस। अपन मनखे मन संग हँसी-ठिठोली अउ सादगी ले भरपूर माहौल…ओपी चौधरी ह आगू लिखिन कि अइसने छोटे-छोटे स्थानीय जगह मं बइठ के हाथ ले चटखारा लेके खवई-पियई, हमर अपन संस्कृति अउ अपनपन के असल चिन्हारी आय।
माटी के खुशबू, देसी स्वाद अउ अपन मनखे मन के संगवारीपन…यही तो हमर छत्तीसगढ़ के खासियत आय।वित्त मंत्री के ये सादगी भरे अंदाज अउ स्थानीय छोटे व्यवसाय ला बढ़ावा दे के पहल ला लोगन मन ह बहुत सराहत हें। अम्मा दाई होटल जइसे स्थानीय होटल मन ही हमर छत्तीसगढ़िया संस्कृति ला जियत-जागत रखे हें।
